Чаткалдын жанды кейиткен кооптуу жолу
Чаткал районун облус менен байланыштырган жол көйгөйү чечилбесе, элдин жашоосу оорлоп, азык-түлүк, тамак-аш жана күйүүчү май кымбат сатылып жатат. Бул маселени Жалал-Абаддын облус жетекчилиги менен жолугушууда район тургундары көтөрүштү. Жергиликтүү бийлик аталган жолду оңдоо үчүн быйыл өкмөт каражат бөлөрүн убада кылды. Деген менен бийликтин жылда берген убадасына ишенип, күн санаган элдин чыдамы түгөнгөндөй. Кыргызстандагы алыскы райондордун бирин Жалал-Абад шаары менен тутыштырган 500 чакырым жолдун дээрлик 200 чакырымы катаал жана начар болуп, каттамдар үзгүлтүккө учурап жатат.