Кыргызстандын мурдагы вице-премьер-министри Базарбай Мамбетов 22-октябрда 75 жаш курагында узакка созулган оорудан кийин дүйнө салды.
Таластын Балбал айылында 1948-жылы туулган Мамбетов эмгек жолун 1969-жылы Кыргызстандын ошол кездеги Курулуш министрлигинде баштаган. Ал бир катар ири мекеменин имаратынын курулушун жетектеп, өлкөнүн эмгек сиңирген куруучусу наамына татыган жана бир топ мамлекеттик сыйлык менен сыйланган.
Кыргызстандын Борбор Азия жана Көз каранды эмес мамлекеттер шериктештиги (КМШ) алкагында соода-сатыгын жөнгө салуучу тармакка жооптуу болуп, вице-премьер министр кызматын ээлеген, КМШ жана Евразия экономикалык биримдиги (ЕАЭС) уюмундагы расмий өкүлү болгон.
2011-2013-жылдары Кыргызстандын Түркмөнстандагы элчиси болуп эмгектенген.
Маркумду акыркы сапарга узатуу зыйнаты 24-октябрда Бишкекте өтөт.
2019-жылы “Азаттыктын” “Бийлик сырлары” көрсөтүүсүндө Мамбетов Кыргызстандын Кумтөр жана башка алтын кендерине жайылып кеткен жемкорлук тууралуу айтып берген.
Facebook шеринеси