Кыргызстанда орто мектептерде 841 мугалим жетишпейт. Бул тууралуу билим берүү жана илим министринин милдетин аткаруучу Догдуркүл Кендирбаева 3-октябрда Жогорку Кеңештин Социалдык саясат боюнча комитеттин жыйынында билдирди.
Ал келтирген маалыматка ылайык, Бишкекте 213, Ош шаарында 25, ал эми облустардан Баткенде 129 мугалим жетишсиз. Алардын көбү орус тили жана так илимдер боюнча предметтерге тиешелүү.
Расмий маалымат боюнча Кыргызстанда 82 миң мугалим бар. Алардын үчтөн экиси элет жеринде эмгектенет.
Парламенттеги тармактык комитет билим берүү жана илим министри кызматына Догдуркүл Кендирбаеванын талапкерлигин карап жатат. Аны президент Садыр Жапаров 28-сентябрда министрдин милдетин аткаруучу кылып дайындаган.
Догдуркүл Кендирбаева “Роза Отунбаеванын демилгеси” фондунун аткаруучу директору болуп иштеп келген. Ал 2012-жылдары билим берүү жана илим министринин орун басары болуп иштеген.
Facebook шеринеси