Сербиянын Белград шаарында өтүп жаткан күрөш боюнча Дүйнө чемпионатында эркин күрөш боюнча кыргызстандык балбан Эрназар Акматалиев коло медал үчүн күрөшөт. Беттеш 16-сентябрда болот.
15-сентябрда 70 килограмм салмакта Эрназар Акматалиев жарым финалга чейин жетип, жапониялык балбан Тайши Нарикуниге 10:10 эсебинде утулуп калды. Акыркы ыкманы Нарикуни жасагандыктан жеңиш ага берилди. Акматалиев ага чейин 1/8 финалда молдовалык Максим Сакултанды (14-2), чейрек финалда болгариялык Рамазан Рамазановду (11-0) мөөнөтүнөн мурда жеңген.
15-сентябрда кыргызстандык дагы бир балбан, 79 килограмм салмакта күрөшкөн Арсалан Будажапов күч сынашты. Ал 1/16 финалда франциялык Сайфедин Алекманы (2-2), 1/8 финалда тажистандык Шухрат Бозоровду (10-0) уткан. 1/4 финалда АКШлык Эрнест Жордандан (10-0) утулуп каршылашы финалга чыкты. Арсалан Будажапов 16-сентябрда көңүл жубатуучу беттешке чыгат. Аны утса коло байге үчүн күрөшөт.
24 жаштагы Эрназар Акматалиев 2021-жылы Норвегиянын Осло шаарында өткөн эркин күрөш боюнча чоңдор арасындагы Дүйнө чемпионатында күмүш байге алган. Ушул эле жылы Сербиянын Белград шаарында болгон күрөш боюнча 23 жашка чейинкилер арасында (U-23) Дүйнө чемпиону аталган.
Жаштар арасындагы Азия чемпионатында (2018-жыл) жана 2022-жылы апрель айында Монголиянын Улан-Батор шаарында болгон күрөш боюнча чоңдор арасында Азия чемпионатында күмүш медал тагынган. 2021-жылы Токиодо өткөн Жайкы Олимп оюндарына катышкан. Ушул жылдын август айында Түркияда өткөн V Ислам шериктештиги оюндарында алтын байге алган.
29 жаштагы Арсалан Будажапов 2020-жылдагы Азия чемпиону. Бир катар эл аралык мелдештердин байге ээси.
Белградда өтүп жаткан күрөш боюнча (грек-рим күрөшү, эркин күрөш жана кыз-келиндер күрөшү) Дүйнө чемпионаты 18-сентябрга чейин уланат.
11-сентябрда Акжол Махмудов грек-рим күрөшүнөн 77 килограмм салмакта, 13-сентябрда Жоламан Шаршенбеков 60 килограмм салмакта алтын алган. Грек-рим күрөшүнөн 67 килограмм салмакта Амантур Исмаилов коло тагынган.
Facebook шеринеси