Өзбекстанда өткөн кылымдын 20-30-жылдарында коммунисттик режимдин репрессиясына кабылган дагы 198 киши акталды. Алардын тизмеси 6-майда өлкөнүн Жогорку сотунун сайтына жарыяланды.
Мекеменин маалыматына караганда, алар Каракалпакстанда, Ташкентте, Фергана, Хорезм, Бухара, Жизак жана Наманган облустарынын аймагында «контрреволюциялык иш-аракеттерге, куралдуу көтөрүлүштөргө, терроризмге, бандитизмге, тыңчылыкка, полиграциялык жана антисоветтик ишмердүүлүккө, улуттук боштондук кыймылына, басмачылык аракеттерге катышкан» деген мүнөздөгү жалпысынан 11 кылмыш иши боюнча соттолуп, жазага тартылган.
2020-жылдын 8-октябрында Өзбекстанда Репрессиялардын курмандыктарынын өмүрүн жана ишмердүүлүгүн изилдөө, алардын эс-тутумда сакталышын уюштуруу боюнча республикалык жумуш тобу түзүлгөн.
Топ илимий изилдөөлөрдүн натыйжасында аныкталган жана кайсы бир себептен улам акталбай калган репрессия курмандыктарын актоо тууралуу сунуштарды иштеп чыккан.
2023-жылы Өзбекстандын Жогорку соту 1929-1931-жылдары советтик режим учурунда репрессия курмандыгы болгон, беш кылмыш иши боюнча айыпталган 240 жаранды реабилитациялаган.
Жалпысынан советтик мезгил учурунда түрдүү куугунтукка кабылган, атууга кеткен 1,31 миң өзбекстандык акталды. (RK)
Facebook шеринеси