Линктер

ЧУКУЛ КАБАР!
29-Март, 2024-жыл, жума, Бишкек убактысы 05:20

Дача-СУ: учак курмандыктарын эскерүү (видео)


Эстеликтин ачылышы. 13-январь, 2018-жыл
Эстеликтин ачылышы. 13-январь, 2018-жыл

13-январда бир жыл мурун "Манас" аба бекетинин жанындагы Дача-СУ айылында болгон учак кырсыгынын курмандыктарына арналып, эстелик ачылды.

Эстеликтин ачылышына президенттик аппараттын жетекчисинин биринчи орун басары, кырсыктын кесепетин жоюу боюнча өкмөттүк комиссиянын төрагасы Мухамметкалый Абулгазиев баш болгон жогорку кызмат адамдары, өкмөт мүчөлөрү, кырсыкта набыт кеткендердин жакындары, коомчулук өкүлдөрү катышты.

Эстеликтин ачылышы.
Эстеликтин ачылышы.

Элди сабырдуулукка чакырган президенттик аппараттын жетекчисинин биринчи орун басары Мухамметкалый Абулгазиев, кырсыктан жабыркагандарга, набыт кеткендердин жакындарына жалпы өлкө жарандары чогулткан каражат толук берилгенин, ошондой эле кырсыкка кабылган учактын ээси - түркиялык компания да жабыркагандарга кенемте төлөгөнүн маалымдады:

- Акчалай жардамдарды каза болгондордун жакындары өздөрү бөлүштүрдү. Түрк компаниясы төлөгөн кенемтенин суммасы курман болгондордун жакындарынын каалоосу боюнча ачык айтылган жок. Эч ким нааразы болгон жок.

Абулгазиевдин айтымында, 39 кишинин өмүрүн алган учак кырсыгына күнөөлүү тарап так аныктала элек, бирок тергөөнүн алдын ала божомолу боюнча, кырсыкка учкучтар күнөөлүү деп табылган. Абулгазиев бул акыркы тыянак эмес экенин, эл аралык комиссия кырсыктын себептерин дале иликтеп жатканын да кошумчалады.

Абулгазиев: Кырсык учкучтардын катасынан болгон деп ойлойбуз
please wait

No media source currently available

0:00 0:05:53 0:00

Кырсыктан жабыркагандарга кыргызстандыктар жардам чогултуп, Өзгөчө кырдаалдар министрлигинин атайын эсебине элден 102 миллион сомдон ашык каражат түшкөнү маалым.

Учак кырсыгынан жабыркагандардын өкүлү Венера Шейшенова өкмөттүк комиссияга нааразылыгы жок экенин билдирип, бийлик органдары жабыркагандардын бардык маселелерине көмөк көрсөттү деп айтты.

- Акча менен эч качан эч нерсе чечилбейт. Миллиондоп берсе дагы биздин өтүп кеткен балдарыбыздын, өтүп кеткен туугандарыбыздын бир секунддук өмүрүнө бул тете келбейт. Бизге бул абдан оор жоготуу.

Учак кырсыгынын курмандыктарына эстелик тургузулду
please wait

No media source currently available

0:00 0:03:47 0:00

Былтыр 16-январда "Манас" аба бекетинин жанындагы Дача-СУ айылына кулаган учак Түркиянын АСТ Havayolları компаниясына таандык болгон. Ишкана азыр Гонконг-Бишкек-Стамбул авиакаттамы аркылуу жүк ташыбайт. Гонконг-Бишкек-Стамбул авиа жүк каттамынын жадыбалы 2016-жылдын 18-октябрынан 2017-жылдын 20-мартына чейин бекитилген. Бирок кырсыктан кийин түрк компания бул каттамда рейстерин токтоткон. Бул тууралуу "Азаттыкка" Түркиянын АСТ Airlines компаниясынын башкаруучулар коллегиясынын мүчөсү Хамза Тыглай билдирди. Анын айтымында, жабыркагандарга кенемте төлөнүп берилген.

Эстеликтин ачылышында.
Эстеликтин ачылышында.

​Былтыр 16-январда "Манас" аэропортуна жакын жайгашкан Дача -СУ айылына жүк ташыган учак кулаган. Андан жергиликтүү 35 тургун, 4 учкуч набыт болгон. Алгачкы маалыматтар боюнча, учак аэропортко май куюу үчүн токтогону келе жатып кырсыктаганы маалымдалган. Кийинчерээк учактагы жүктүн бир бөлүгү кыргызстандык жаранга тиешелүү экендиги айтылып, бирок жүктүн ээси ким экени табышмак бойдон калган. Бул маселе боюнча президенттин өкүлү бүгүн кыскача маалымат берип, учактагы жүк боюнча да тергөөнүн жыйынтыгында айтыларын белгиледи.

Архив: Дача айылына кулаган учак. 16.01.17

"Азаттыктын" материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.
  • 16x9 Image

    Токтосун Шамбетов

    "Азаттык" радиосунун журналисти. 2014-2016-жылдары "Азаттык+" телепрограммасынын алып баруучусу. 2012-2014-жылдары "Азаттыктын» Нарын облусундагы кабарчысы болуп иштеген. Нарын мамлекеттик университетинин техникалык факультетин аяктаган. "Мыкты жаш журналист 2013" наамынын ээси. Твиттерде: @Tokojan  

  • 16x9 Image

    Бакыт Асанов

    "Азаттык Медианын" директору. "Эксперттер талдайт" программасынын алып баруучусу. 2011-жылы Кыргыз-түрк "Манас" университетинин Коммуникация факультетин артыкчылык диплому менен аяктаган. 

XS
SM
MD
LG