Бүгүн 12-октябрда Бишкекте Көз каранды эмес мамлекеттер шериктештигине (КМШ) мүчө өлкөлөрдүн тышкы иштер министрлеринин жыйыны өтүп жатат. Ага тогуз өлкөнүн – Азербайжандын, Армениянын, Беларустун, Кыргызстандын, Казакстандын, Өзбекстандын, Орусиянын, Тажикстандын жана Түркмөнстандын башкы дипломаттары катышууда.
Бул жолку отурумга Молдованын өкүлдөрү келген жок. Армениядан тышкы иштер министринин орун басары катышууда.
Молдова 2022-жылдын ноябрь айында КМШдагы мүчөлүгүн токтото туруу чечимин жарыялаган жана быйыл уюмдан биротоло чыгуу процессин баштаган.
Министрлер Бишкекте 13-октябрда өтө турган президенттердин саммитинде карала турган маселелерди талкуулашат.
КМШ саммитинде уюмга мүчө өлкөлөрдүн соода-экономикалык, маданий-гуманитардык чөйрөлөрдө кызматташтыгын кеңейтүү жана чыңдоо боюнча чечимдер кабыл алынарын президенттин администрациясынын тышкы саясат бөлүмүнүн башчысы Муратбек Азымбакиев 4-октябрда билдирген. (KbA)
Facebook шеринеси