Улуттук статистика комитети энергетикалык ишканалар 2022-жылы 13,9 млрд кВт/саат электр энергиясын өндүргөнүн, бул 2021-жылга салыштырмалуу 8,3% аз экенин билдирди. Былтыр Кыргызстан 16,1 млрд кВт/саат электр жарыгын керектеп, 550,0 млн кВт/саат электр энергиясын сыртка экспорттоду.
Статистика комитети өткөн жылы электр жарыгынын жалпы жоготуулары болжол менен 2,4 млрд кВт/саат болгонун, анын 95,2% техникалык жоготууларга туура келерин кошумчалады.
Өлкөдө жети ири гидроэлектр станциясы иштейт: Токтогул, Күрп-Сай, Шамалды-Сай, Таш-Көмүр, Үч-Коргон, Камбар-Ата-2 жана Ат-Башы. Алар өлкөдөгү электр энергиясынын 86% жакынын өндүрөт.
Энергетика министрлиги быйыл кышында үйлөрдү электр жарыгы менен жылытууга тыюу салынарын билдирди. Мекеме муну “Токтогул” гидроэлектр станциясында (ГЭС) суу өткөн жылга салыштырмалуу дээрлик 2 млрд куб метр аз топтолгону менен байланыштырууда.
Ушундан улам Кыргызстан күз-кыш мезгилинде Орусия менен Түркмөнстандан 3,4 млрд кВт/саат электр энергиясын сатып алат.
Эң ири Токтогул суу сактагычында суу аз болуп жаткандыктан, электр кубатын өндүрүү быйыл 15 млрд кВт/саатка жетпей калышы мүмкүн деп болжолдонууда. (BTo)
Facebook шеринеси