Бишкектеги шаардык перинаталдык борборунда 20-июнда үч эм: эки кыз, бир уул жарык дүйнөгө келди.
Саламаттык сактоо министрлиги маалымдагандай, ымыркайлардын бири - 1,4 килограмм (уул бала), кыздардын бири 1,74 килограмм, экинчиси - 1,69 килограмм салмакта төрөлдү.
"Ымыркайлар мөөнөтүнөн мурда - 33 жумасында жарык дүйнөгө келди. Алгачкы үч күн жандандыруу жана интенсивдүү терапия шартында болушту. Абалы турукташкандан кийин энесинин жанына которулушту. Учурда апасынын жанында дарылануусун улантып жатышат", - деп билдирди мекеменин басма сөз кызматы.
Ымыркайлардын апасы 33 жашта, улуу баласы бар.
Расмий маалыматка караганда, былтыр 2022-жылы 1380 эгиз, 13 үч эм жана бир төрт эм төрөлдү.
2021-жылы 1452 эгиз, 17 үч эм, ал эми 2020-жылы 1552 эгиз, 18 үч эм бала жарык дүйнөгө келген.
Он жылдык мөөнөттү алып карасак, 2012-2019-жылдары статистика улам жогорулап, эм төрөлгөндөр 1286дан 1640ка жеткен.
Соңку он жылда Кыргызстанда алты жолу төрт эм (алардын экөө былтыр) төрөлгөн.
Былтыр Кыргызстандын калкы 7 миллионго жетти. Өлкөнүн миллиондон ашуун жараны чет өлкөлөрдө эмгек мигранты болуп жүрөт.
Жогорку Кеңештин депутаттары үч же андан көп эм төрөлгөн үй-бүлөлөргө бир жолку 500 миң сом сүйүнчү пул берүү демилгесин көтөрүп, ал парламенттен колдоо тапканы менен күчүнө кире элек.
Кыргызстанда 2018-жылдын 1-январынан тартып балага 4 миң сом сүйүнчү пул чегериле баштаган. (ZKo)
Facebook шеринеси