Орусия Эл аралык валюта фондунун (ЭВФ) Украинадагы согушту токтотууга чакырган биргелешкен коммюникесине кайрадан бөгөт койду. Бул тууралуу Испаниянын экономика министри Надия Кальвиньо ЭВФтин 14-октябрдагы чогулушунан кийинки маалымат жыйынында билдирди.
"Апта бою Орусияны Украинадагы согушту токтотууга чакырып келдик. Азыр энергетикалык жана азык-түзүк коопсуздугуна коркунуч келтирген, глобалдуу өсүштү жайлаткан негизги фактор болууда. Согуш инфляцияга таасирин тийгизип, бүткүл дүйнөдө туруксуздук, белгисиздикти жаратууда", - деди Кальвиньо.
ЭВФтин башчысы Кристалина Георгиева "дүйнөдөгү экономиканы жакшыртуунун бир гана жолу - согушту токтотуу" экенин билдирди.
Орусиянын өкүлдөрү мындай чакырууларга макул болгон жок. Бул ЭВФти коммюникенин ордуна билдирүү жасоого аргасыз кылды.
Украинага басып кирүүсүн айыптоо менен макул болбогондуктан, Орусия ЭВФтин 2022-жылдын апрель айында өткөн сессиясынан кийин коммюнике чыгарууга бөгөт койгон.
Дагы караңыз
Facebook шеринеси