Германия жиберген Panzerhaubitze 2000 үлгүсүндөгү өзү жүрүүчү артиллериялык гаубицалар биринчи жолу Украинага келип түштү. Бул тууралуу Украинанын коргоо министри Алексей Резников кабарлады.
Анын айтымында, гаубицаларды колдонууну үйрөнгөн украин экипаждары согушка толук даяр болду.
Резников бул техникалар украин армиясындагы 155-калибрдеги артиллериянын алтынчы түрү болуп саналарын маалымдады. Буга чейин аларда ушул багыттагы M777, FH70, M109, AHS Krab жана Caesar деп аталган гаубицалар бар болчу. Алардын айрымдары сүйрөп жүрүүчү, кээлери өзү жүрүүчү техника болуп саналат.
Украинанын Германиядагы элчиси Андрей Мельник немис өкмөтү өзү жүрүүчү Panzerhaubitze 2000 гаубицаларынын кийинки партиясын июндан баштап жибере турганын жарыялаган эле.
Гаубица - бул бута түз көрүнбөгөн жерлерден атууга ыңгайлашкан артиллериялык курал болуп саналат. Ал кадимки замбиректер (пушка) менен бир калибрде болот, болгону гаубицанын найы (ствол) узунураак болот жана алысыраак аралыкка атылат. Гаубицалар өзү жүрүүчү жана сүйрөлүүчү болуп бөлүнөт.
Орусиянын аскерлери Украинага 24-февралда басып кирген. Украиндердин катуу каршылыгынан улам Москва өзү каалаган максаттарга, анын ичинде Киевди алуу ниетине жетпей калган. 22-апрелде өздөрү “атайын операция” деп атаган аракетинин “экинчи фазасын” баштаганын жарыялаган. Анда Орусия көз карандысыз деп тааныган Украинанын Луганск жана Донецк облустарындагы жикчил “республикалардын” аймактарын бошотуу каралган. Мындан сырткары аннексияланган Крымга кургактыктан коридор ачуу жана Молдованын жикчил Приднестровье аймагына жол ачуу да максаттардын бири катары аталган.
Батыш чалгын кызматтарынын баасына караганда, Донбасс аймагында Орусиянын аракеттери ийгиликсиз болуп жатат жана орус күчтөрү өтө чоң жоготууларга учурады. (ErN)
Facebook шеринеси