Быйыл Түркиянын Анталья курорттук шаарына келген орусиялык туристтердин саны коронавирус пандемиясы башталганга чейинки мезгилге же 2019-жылга салыштырмалуу 72 пайызга азайды.
Орусиянын Туроператорлор биримдигинин маалыматына ылайык, 2022-жылдын алгачкы беш айында Антальяга 367,8 миң орусиялык турист барган. 2019-жылдын бул мезгилинде Антальяда эс алган орус туристтеринин саны 1,3 миллионго жеткен болчу.
Туроператорлор биримдиги Антальядагы орусиялык туристтердин азайышын геосаясий кырдаал жана санкциялар менен байланыштырып жатат. Маалыматка ылайык, 2022-жылдын январь айында үч жыл мурдагы салыштырмалуу Антальяга барган орусиялыктардын саны 16 пайызга көп болгон. Бирок Орусия Украинага кол салгандан кийин туристтердин агымы андан кескин түрдө басаңдай баштаган.
Маселен, 2019-жылга салыштырмалуу быйыл февраль айында Түркиянын курорттук шаарына келген орус туристтеринин саны 12 пайызга, апрель айында 81 пайызга азайып кеткен.
"Росстаттын" маалыматына ылайык, 2022-жылдын биринчи кварталында Түркияга багыт алган орусиялык туристтердин саны былтыркыга салыштырмалуу 23 пайызга кыскарган.
Facebook шеринеси