Президент Садыр Жапаров Азербайжанга иш сапары учурунда азербайжандык бизнес өкүлдөрү менен жолугуп, Кыргызстанга инвестиция салууга чакырды. Бул тууралуу президенттин маалымат кызматы кабарлады.
Жолугушууга мунай өндүрүү, курулуш, туризм, энергетика, телекоммуникация, жогорку технологиялар, айыл чарба, тоо кендерин иштетүү, камсыздандыруу тармагындагы ири компаниялардын жетекчилери катышкан.
Жолугушууда президент Садыр Жапаров келечектүү тармактарга токтолуп, потенциалдуу инвесторлорду Кыргызстандагы экономикалык долбоорлорду ишке ашырууга катышууга чакырды.
Азербайжандын экономика министри Микаил Жаббаров эки өлкөнүн президенттеринин ийгиликтүү сүйлөшүүлөрүнөн кийин соода-экономикалык жүгүртүүнү жана инвестицияны көбөйтүүгө жагымдуу шарттар түзүлгөнүн белгилеген. Жолугушууда суроо-жооптор болду.
Кыргызстандын Инвестициялар боюнча улуттук агенттиги менен Азербайжан Республикасынын Экспортту жана инвестицияларды илгерилетүү агенттигинин (AZPROMO) ортосунда кызматташуу жөнүндө меморандумга кол коюлду.
Жапаров расмий сапары менен Азербайжандын борбору Баку шаарына 19-апрелде барды. 20-апрелде Баку шаарындагы “Загулба” президенттик сарайында президенти Садыр Жапаров менен Азербайжан Республикасынын президенти Ильхам Алиевдин расмий жолугушуусу өттү. (JsA)
Facebook шеринеси