Чүй облусунун Сокулук районунун Орок айылындагы муниципалдык менчикте турган 47,7 гектар жер трансформацияланып, “Калктуу конуштардын жерлери” категориясына которулду. Бул ЖЭБ-2 аймагына кирет.
Тиешелүү чечимге Министрлер кабинетинин төрагасы Акылбек Жапаров кол койгонун өкмөттүн басма сөз кызматы 2-декабрда кабарлады.
Финансы министрлигине республикалык бюджеттен көрсөтүлгөн жер участогуна шаар куруу документтерин иштеп чыгуу үчүн 5 миллион сом бөлүү тапшырмасы берилди.
15-ноябрда президент Садыр Жапаров Бишкек шаарынын ЖЭБ-2 аймагына үйлөрдү куруп алган тургундар менен жолугуп, Министрлер кабинетине жер тилкелерин мыйзамдаштырып берүүнү тапшырган.
Ошол эле кезде бийлик ЖЭБ-2 объектисин 2022-жылдын соңу, 2023-жылдын ортосунда ишке киргизүүнү пландап жатат.
Садыр Жапаров 22-ноябрда “Ак-Ордо-3” конушунун жашоочулары менен жолугушууда 2022-жылдын май айына чейин 11 миңден ашык түтүнгө кызыл китеп берилерин, Кыргызстанда документи жок үй болбошу керектигин айткан. (BTo)
Facebook шеринеси