Кошмо Штаттардын Мамлекеттик департаменти Ооганстандагы "Ислам мамлекети-Хорасан" экстремисттик уюмунун үч мүчөсүн өтө коркунучтуу глобалдык террорчулардын тизмесине кошту. 22-ноябрда мекеме тараткан билдирүүдө дагы бир адам аталган уюмга каржылык жардам көрсөткөнү үчүн Американын Каржы министрлигинин санкциясына кабылганы жазылат.
Глобалдык террорчулардын катарына кошулгандардын арасында Шахаб аль-Мухажир деген ат менен таанымал Санаулла Гафари бар. Аны "Ислам мамлекети-Хорасан" радикал уюмунун "азыркы эмири" деп коюшат.
Мамлекеттик департаменттин билдирүүсүнө караганда, Гавари террордук топтун башчылыгына 2020-жылдын июль айында дайындалган. Ал Ооганстандын аймагындагы уюмдун бардык операцияларына жооптуу. Ошондой эле тизмеге "Ислам мамлекети-Хорасан" тобунун маалымат катчысы, "Султан Азиз" деген лакап ат менен белгилүү Азиз Азам жана топтун Кабулдагы жогорку даражалуу өкүлү Маулави Ражаб да кирди.
"Ислам мамлекети-Хорасан" радикал тобу Ооганстандын бийлигине талибдер келгенден кийин чабуулдарын күчөттү. АКШнын билдирүүсүндө, аталган топ былтыр 60 кол салуу уюштурган. Быйыл зомбулук 334кө көбөйдү.
Бир апта мурда "Ислам мамлекети-Хорасан" Кабулдун шийилер отурукташкан районунда уюштурулган жардыруу үчүн жоопкерчиликти өз моюнуна алды. Кандуу окуяда белгилүү ооган тележурналисти көз жумду.
Facebook шеринеси