6-ноябрда Бишкек мэриясына караштуу «Тазалык» муниципалдык ишканасынын кызматкерлери Жогорку Кеңештин имаратынын айланасындагы темир торду ала баштады. Бул чечим 5-ноябрда Жогорку Кеңештин төрагасы Талант Мамытовдун мэрге жазган расмий катынан кийин аткарылган.
Мэрдин милдетин аткаруучу Балбак Түлөбаев имараттын тегерегин көрктөндүрүү боюнча иш башталарын айтты.
«Бул тосмону алуу идеясы премьер-министр, президенттин милдетин аткаруучу Садыр Жапаровго таандык. Муну символикалуу көрүнүш десек болот. Эл менен бийликтин ортосундагы тосмону алуу боюнча демилге болуп саналат», - деди Түлөбаев.
Ал эми алынган темир тосмолор кайсы жакка берилери азырынча чечиле элек. Түлөбаевдин айтымында, имараттын жанындагы 7-апрель окуяларынын курмандыктарынын аттары жазылган эстелик такта алынбайт.
Тосмону алууну Жогорку Кеңештин төрагасы Талант Мамытов да көзөмөлдөп турду. Парламенттин имараты Кыргызстандын өзгөчө коргоого алынган объектиси болуп саналат. (BCh)
