5-майда Тажикстандын саламаттык сактоо министри алмашты. Президенттин жарлыгында Насим Олимзода “башка ишке өткөнүнө байланыштуу” деп гана жазылган. Анын ордуна “Истиклол” медицина борборунун жетекчиси Жамолиддин Абдуллозода дайындалды.
Президенттин жарлыгы уулу Рустам Эмомали төрагалык кылган Олий Мажлиске бекитүүгө сунушталды.
Тажик бийлиги 30-апрелде гана коронавирус катталганын билдирген. Ага чейин илдетке чалдыккандар жоктугу маалымдалып, тийиштүү карантин чаралары көрүлгөн эмес.
5-майга карата өлкөдө коронавирус 300гө жакын адамга жукканы, алардын бешөө көз жумганы расмий кабарланды.
