2022-жылы Катарда өтө турган дүйнө чемпионатына тандоо оюндарынын алкагында өтүп жаткан мелдештерде, Тажикстан курама командасы эки оюнда 6 упай топтоп, F тайпасынын сап башына чыкты.
10-сентябрда, Улан-Батор шаарында өткөн кезектеги оюнда Тажикстан курама командасы Монголияны 1:0 эсебинде утуп алды. Беттештеги жалгыз голду тажик оюнчусу Давронжон Эргашов 81-мүнөттө киргизди.
F тайпасынын катарлаш беттешинде Мьянма жана Жапония курама командалары беттешип, 2:0 эсебинде Жапония жеңишке жетти. Оюндагы голдорду жапон футболчулары Сёя Накадзима (16-мүнөт) менен Такуми Минамино (26-мүнөттө) киргизди. Бул турда Кыргызстандын курама командасы ойногон жок.
Оюндардын жыйынтыгында F тайпасынын сап башына эки оюнда 6 упай топтогон Тажикстандын курама командасы чыкты. Экинчи орунду 3 упайы менен Жапония ээлеп турат. Үчүнчү орунда эки беттеште 3 упай алган Монголия турат. Кыргызстан менен Мьянманын курама командаларынын эсебинде бир да упай жок.
Ак шумкарлардын тандоо оюндарындагы алгачкы беттеши 5-сентябрда Дүйшөмбү шаарында өтүп, анда кыргыз футболчулары Тажикстандын курама командасына 1:0 эсеби менен жеңилген.
Кийинки турдун оюндары 10-октябрда өтөт. Мында Кыргызстан менен Мьянманын курама командасы менен беттешет. Оюн Бишкектеги Дөлөн Өмүрзаков стадионунда өтөт.
2022-жылы Катарда өтө турган дүйнө чемпионатынын жана 2023-жылы Кытайда өтө турган Азия Кубогунун тандоо оюндарынын 2-баскычында Кыргызстан F тайпасына туш болуп, Тажикстан, Жапония, Мьянма жана Монголия менен атаандаш команда катары ойноп жатат. 5-сентябрда башталган тандоо оюндарынын экинчи баскычы кийинки, 2020-жылдын 9-июнуна чейин уланат.(GT)
