Былтыр дүйнө жүзүндө 101 журналист өлтүрүлгөн. Бул тууралуу Эл аралык Пресса институту (IPI) билдирди. Журналисттер үчүн эң кооптуу аймак – Азия. Ал жерде 40 журналист киши колдуу болуп өмүрүнөн ажыраган, алардын ичинен 15 киши Пакистанда каза тапкан. 32 журналист Түндүк жана Түштүк Америкада өлгөн. Соңку 5 жылдын ичинде дүйнөдө 472 журналист өлүмгө дуушар болгон. Алардын көпчүлүгү Ирак менен Филиппинге туура келет. "Журналисттик кесип барган сайын кооптуу кесипке айланууда" деген бүтүмгө келишти институттун эксперттери.
