Янукович-Тимошенко: айырма эки пайызга кыскарды
Украинадагы президенттик шайлоонун экинчи турунда эсептелген добуштар боюнча Региондор партиясынын лидери Виктор Янукович менен премьер-министр Юлия Тимошенконун ортосундагы айырма кыскарууда. Азыркы учурда добуштардын 95 пайызы эсептелип бүтүп, Янукович эки пайыздай алдыда келатат. Ал 48 пайыздан көбүрөөк добуш алды. Ал эми Тимошенкого берилген добуштар 46 пайыздан ашты. Шайлоочулардын төрт пайыздайы бардык талапкерлерге каршы добуш беришти.
Жарыяланган учуру: 08.02.2010
Украинанын Борбордук шайлоо комиссиясынын маалыматына караганда добуш берүүгө шайлоочулардын 69 пайызы катышты. БШК добуш берүү учурунда орчундуу мыйзам бузуулар болгон жок деп билдирди.
Янукович Киевде болгон басма сөз жыйынында өзүнүн жеңишин жарыялап жиберди. Ал эми Тимошенконун штабынан добуштарды өз алдынча эсептеп жатышканын жана анын натыйжасы боюнча эки талапкерге добуштар бирдей санда берилген деп билдирүүдө. Юлия Тимошенко мурда сүйлөгөн сөздөрүндө эгер шайлоо таза өтпөсө массалык каршылык акцияларына элди алып чыгарын билдирген.