Алексей Дымовскийдин үстүнөн кызмат абалынан пайдаланган жана алдамчылыкка барган деген кинелер менен кылмыш иштери козголду.
Кыскача тарыхы
Дымовский мырза былтыр (2009-жылы) YouTube интернет барагында жарыяланган видео тасмасында Новороссийск ички иштер бөлүмүндө милиция кантип мыйзам бузуп, кантип кызмат абалынан пайдаланып жатканын ачык айтып чыккан эле. Кийин аны «ушак таркаткан» деген айып менен тартип сактоо органынан бошотуп ийишкен.
Өткөн жылы ноябрь айынын этегинде ал кездеги милициянын майору Алексей Дымовский Интернеттин YouTube барагынан видео тасмада сүйлөп, өлкөнүн премьер-министри Владимир Путинге жана өз кесиптештерине кайрылган.
Ал жерде орусиялык милиция жааты кантип паракорчулукка барып атышканынын бетин ачкан айрым мисалдарды келтирген.
Ошондой эле милицияны кол толгоо жолу менен жок жердеги кылмыштын жопкерчилигин алуу үчүн карапайым кишилерди мажбарлап атат деген доо камтылган.
Ал калган кебин Путин менен жолукканда айта тургандыгын да кыйыткан.
Маселен, ал жерде Алексей Дымовский мындай деген:
- Ишти аткарууда алдын ала түзүлчү план мени тажатып бүттү. Бизге алдын ала эле мобул кишилерди камоо керек деген көрсөтмө берилет. Кишилерди кармоо үчүн атайылап аларга жалаа ойлоп таап, анан кармайбыз. Ошол да мени тажатып бүттү.
Анын жолун жолдоочулар
Ошондон соң Дымовскийди туурап Интернет аркылуу ич күптүлөрүн айткан башка да орусиялык милиция кызматкерлери көбөйгөн.
А демилгечи Дымовскийди болсо жергиликтүү милиция жетекчилиги «ушак-айың жайылттың» деп күнөөлөп кызматтан айдаган.
Өкүмөт башчы Путин да бул «козголоңчуну” кабыл албай койгон.
Жөн гана кызматтан айдалбастан, былтыр декабрь айынын этегинде Дымовский мырзанын үстүнөн митаамдык кылган, ага кошумча кызмат абалынан пайдаланган деген кылмыш иштери козголгон.
Мурдагы милиционер “акмын” дейт
Бирок Дымовский ал айыптар өзүнө жалган жерден тагылганын белгилеп, доолорду мойнуна алган эмес.
Маселен Рейтер кабар агенттигине берген жообунда ал: «Мен моюнумда кандайдыр бир күнөөм бар экенин сезбейм» - деген.
Дымовскийдин адвокаты Сергей Губарь мырзанын айтканына караганда, мындай жорукту бийлик атайылап жасап атат:
- Бийлик милицияда калган абийири бар кызматкерлерге жыландын башын чыгарып, аларды коркутуп атат. «Эгерде система буюргандай иш аткарбайт экенсиңер, анда силер да Дымовскийдин кейпин кийип каласыңар» деп атат.
Коомчулуктун тынчсыздануусу
Орусия коомчулугу тартип сактоого чакырылган полиция (милиция), тескерисинче, кайра тартип бузуп, карапайым кишилерге ыдык көрсөткөн учурлар үчүн кабатырланууда.
20-январда, маселен, Орусиянын Сибирдеги шаары Томскиде журналист Константин Поповду жергиликтүү милиция өкүлдөрү токмоктоп, жарым жан акыбалда таштап койгон экен, ал эсине келе албай атып акыры мерт болду.
«Томская неделя» басылмасынын баш редактору Александр Деев:
- Эң өкүнүчтүүсү, томскилик журналист (Поповду – ММ) мыкаачылык менен милиция кызматкеринин өлтүрүшү – аймакта биринчи жолу болуп аткан жорук эмес.
Жергиликтүү серепчилердин айтымында, Орусиядагы милиция кызматкерлеринин арасынан кылмыш ишине анын мыйзамсыз жорук экенин алдын-алда биле туруп баргандардын катары артып барат.
Анын бир мисалы катары алар жакында эле милициянын мурдагы майору Денис Евсюковдун дүкөнгө кирип барып үч кишини өлтүрө атып, алты кишини жарадар кылышын эскеришет.