Мединада дагы бир кыргызстандык ажы каза болду
Мединада дагы бир кыргызстандык ажы каза болду. Саударабстандын аэропортторунда авиакаттамдар кыйла кечигип сапар алууда.
Жарыяланган учуру: 11.12.2009
Биз оболу Кыргызстандын Мекедеги ажылык штабынын башчысы Мамбетасан-ажы Ибраев менен телефондо сүйлөштүк:
- Мамбетасан-ажы, сиз азыр кайсы жердесиз?
- Мен азыр Мекедемин. Түндө эле 400дөй ажыны узаттык Мекеден. Эртең ушу Мекедегилердин акыркысы Ошко учат. Кыйла ажылар Мединада азыр.
- Эмне жаңылыктар бар?
- Биз ажыларды узатуу менен эле алекпиз. Мединада дагы бир кыргызстандык ажы – 39 жаштагы Барно Шадманова деген Ош шаарынын тургуну каза болду. Ооруп ааламдан өтүптүр. Жанында туугандары бар экен.
- Мамбетасан-ажы, биздин угушубузга караганда, Саударабстандын аэропортторунда кечигип учуп атышыптыр го ажылар?
- Ошондой болуп атат. Ага ошо аэропорттор өздөрү күнөөлүү. Миллиондогон адамдар кирип-чыгып атканда жүктөрдү учактарга үлгүрүп жүктөй албай кыйналышат экен. А учактар кечикпей эле келүүдө. Айып өздөрүндө болгон үчүн – кечиксе да жөнөтүүдө. Эгер биздин авиакомпанияларда күнөө болгондо айып-пул төлөтүшмөк дароо. Акыркы ажыларыбыз 16-декабрда учат бул жактан. Штаб да ошондо кетебиз Кыргызстанга. Ажыларды күтүп жаткандарга айтаарым, анча-мынча кечигүүлөргө сарсанаа кылбашсын – баарысын жакшы жеткиребиз, буюрса.
Андан кийинки телефон-маегибиз Кыргызстандын Саударабстандагы элчиси Жусупбек Шарипов менен уланды:
- Жусупбек мырза, Кыргызстан тарабынан быйылкы ажылыктын уюштурулушун кандай баалайсыз?
- Дароо эле айтайын, быйылкы ажылык өткөн жылдардагыдан жакшы уюштурулду. Эң алдыңкы стандартка жетти деш кыйын, бирок мурунку жылдарга салыштырганда, жакшы. 3,5 миңдей зыяратчы Кыргызстандан түз Саударабстанга учуп келди. Калгандары башка жакын арадагы мамлекеттер аркылуу келишти.
- Жусупбек мырза, кандай каалоолорду айтат элеңиз ажылык иштерине?
- Бүт баарысын Кыргызстандан түз Саударабстанга учак менен апкелгенге болот. Ошого жетишүү керек. Ажылык учурунда медпункттар көп уюштурулат бул жерде деле. Бирок Кыргызстандан апкелип ошондой медициналык топторду уюштуруу керек. Анткени, кыргызстандык зыяратчылар дээрлик тил билбейт. Бул боюнча, биз мурда дагы сунуш берген болчубуз.