Өкмөт үйүндө жаштар форумуна 300гө жакын жаштар уюмдарынын лидерлери, өкүлдөрү чогулду. Иш-чарага Убактылуу өкмөттүн өкүлү, социалдык тармакты көзөмөлдөгөн Элмира Ибраимова, Эмгек, калкы иш менен камсыз кылуу жана миграция министринин милдетин аткаруучу Бөдөш Мамырова келген.
Чогулгандарга Э.Ибраимова чыгып сөз сүйлөп, бийлик жаштар менен кызматташууга даяр экенин айтып өттү.
-Жаштарга чындап көңүл бурууга убакыт-саат келди. Мына, 7-апрелдеги окуяларда жаштар окко учуп, башкалары жарадар болуп атса да эч коркпостон эски бийликти кетирди. Эми чогуу-чаран иштешип, күчтүү мамлекет түзүүгө аракет кылышыбыз зарыл. Биз силер үчүн ачыкпыз.
Э.Ибраимованын сөзүн залда отурган жаштардын айрымдары бөлүп, Убактылуу өкмөттүн жетекчилеринин келүүсүн талап кылды. Эгерде бийлик башында тургандар келбесе, жыйынга катышпайбыз деп сыртка чыгып кеткендер дагы болду. Мындан соң өкмөттүн аппарат башчысы Эмил Каптагаев чакырылып келип, чогулгандардын ой-мүдөөлөрүн башка бийлик жетекчилерине жеткирүүгө убада берген соң гана жыйын уланды.
Убактылуу өкмөткө суроо-сопкут, сунуштарын берүү үчүн жаштарга 3 мүнөттөн убакыт берилди. Чогулгандар бийлик бутактарынан жаштарга кырк пайыз орун берүү, Жогорку Кеңешке депутаттыкка 21 жаштан баштап ат салышууга мүмкүнчүлүк түзүү, өз бизнесин баштоого жаштарга шарт түзүп берүү сыяктуу сунуштарды жасады.
“Биздин кылым” жаштар уюмунун жетекчиси Чынар Айтбаева эң алгач социалдык-экономикалык абалды турукташтыруу зарылдыгын айтты:
-Социалдык-экономикалык абалды жолго койгон соң жаштарды иш менен камсыз кылууну ойлонуу керек. Ошондой эле жаштарды мамлекеттин эсебинен чет мамлекеттердин күчтүү окуу жайларында окутуу зарыл. Андан соң алар биздин мамлекет үчүн иштеп берсин.Белгилүү төкмө акын Азамат Болгонбаев баары эле саясат, экономиканы сөз кылып атканына нааразы болуп, маданият тармагына дагы көңүл буруу зарылды тууралуу кеп салды:
-
Мына биз экономиканы, туризмди онүктүрүү керек деп атабыз. Ал эми маданиятты унутуп салганбыз. Ошондуктан Манасты кытайлар талашат, тайганды өзбектер биздики дейт. Мындай болбошу үчүн маданиятты колго алалы.Ошондой эле форумда Убактылуу өкмөттүн Жаштар иштери боюнча министрлик түзүү идеясы кызуу талкууга алынды. Ал министрликтин структурасы кандай болот, ага кимдер, кандай принциптер менен ишке алынат, министрлик кандай маселелерди чечээри тууралуу жаштар өз ойлорун ортого салды.
“Кебел” жаштар уюмунун башчысы Мирзат Ажиев мындай министрлик бир нече жылдан бери чечилбей келе жаткан жаштар маселесин колго алууга өбөлгө түзөт деп ишенерин айтат:
-7-апрелден кийин кырдаал өзгөрдү. Жаштар үчүн жаңы мүмкүнчүлүктөр ачылып атат. Түзүлө турган Жаштар иштери боюнча министрлик мамлекеттин өнүгүүсү үчүн жакшы иштеп берет деп ишенем. Эгемендик алгандан бери жаштар ар кыл саясий оюндардын куралы катары колдонулуп, саясатка келүүгө мүмкүнчүлүк ала албай келгени көп айтылат. Апрель ыңкылабын дагы дээрлик жаштар жасаганын, "бийлик алмашууну ишке ашырдык, эми бизге да бийлик бергиле" деген жаштар бир топ кыймыл, уюмдарды түзгөн. Эми алардын дээрлик бардыгы кызмат берүү талабы менен чыккан соң Убактылуу өкмөт министрлик түзүү менен аларды алаксытып, жаш балага момпосуй берген сыяктуу сооротуп коюуну көздөп жатат дегендер жок эмес.
Алардын бири “Жаш ишкерлер кеңешинин” өкүлү Руслан Акматбек буларды айтат:
-Жаштар иштери боюнча министрлик орчундуу маселелерди чече албаган, жөн гана формалдуу орган болуп калабы деген бизде кооптонуу бар.Убактылуу өкмөттүн аппарат башчысы Э.Каптагаев Жаштар иштери боюнча министрликтин курамын жаштар өздөрү акылдашып, түзүшү керек деп айтат.
-Канчалаган жаштар кыймылдары, ар кыл уюмдар бар. Мына, ошолордун өкүлдөрү кеңешип-таңашып туруп министрликтин курамын түзсүз. Бизге сунуш жасасын. Мына ушул туура болот.Жыйын 7-апрелдеги кагылышууда каза тапкан замандаштардын арбактарына багыштап куран окуу менен аяктады. Жаштар форуму эртең дагы уланып, саясат, экономика, билим берүү өңдүү бир нече багыттар боюнча жаштардан түзүлгөн жумушчу топтор бүгүнкү сунуштар боюнча иштешет.