Дагы бир тополоңдун жолу тосулду
Улуттук Коопсуздук кызматы тарабынан массалык тополоң уюштурууга аракет кылган беш адам кармалып камакка алынды. УКМКнын басма сөз кызматы кармалгандар 9-августка массалык тополоң уюштурууну пландаштырышканын жана алардын иш-аракеттери Бакиевдер тарабынан каржыланганы жөнүндө билдирүү жасады.
Жарыяланган учуру: 10.08.2010
Буга байланыштуу “Азаттыктын” суроолоруна Улуттук коопсуздук кызматынын маалымат борборунун жетекчиси Рысбек Быкын уулу жооп берди.
Рысбек Быкын уулу: Улуттук коопсуздук кызматынын аракетинен 9-августка пландаштырылган массалык башаламандык ишке ашпай калды деп айтсак болот. Апрель окуясынын курмандыктарын эскерүү реквием өткөрүү шылтоосу менен Бишкектеги эски аянтка беш миңден ашуун кишинин катышуусунда массалык башаламандыкты уюштуруу пландаштырылган.
Бул иш-чаранын демилгечилери болуп жүргөн Сүйөркулов, Тынаев, Жайылов, Сааданбеков, Казымкулов кармалды. Буларга 40 жаштагы Төрөбай Колубаев жетекчилик кылып келген. Ага өз кезегинде ар кандай жаштардын жана коомдук уюмдар, саясатчылар колдоо көрсөтүп келишкен.
Ошондой эле Төрөбай Колубаев жана анын санаалаштары жаштар арасында акцияларга чакырык жүргүзүп, баракчаларды таратып жүрүшкөн. Ошондой эле мурдагы СССРдин коопсуздук кызматынын кызматкери, БУУнун тынчтык жаратуучу күчтөрүнүн аскери катары белгилеп жалган маалыматтарды таратып жүргөн. Бул топ 27-июндагы референдумду легитимсиз деп санап, калкты 93-жылдагы Баш мыйзамга кайтууга үндөп жүрүшкөн.
- Токтайым Үмөталиева кечээ аларга жактоочулар киргизилбей, мыйзамдык процедураларды бузуу менен суракка алуу жүрүп жатат деп билдирди. Бул боюнча эмне айта аласыз?
Рысбек Быкын уулу: Бул боюнча кошумчалап кетейин, коопсуздук кызматы тарабынан Колубаев жана анын 22 тарапкери колго түшүрүлгөн. Мындан тышкары 10 миңге жакын баракча алынган. Азыркы мезгилде иликтөө иштери уланып жатат. Ошондуктан тергөө иштеринин кызыкчылыгы үчүн аны айтуунун натыйжасы жок.
- Кечээ Улуттук коопсуздук кызматынын алдына кармалгандардын 50-60ка чамалуу жакындары туугандары келип, алардын кармалганынын себебин түшүндүрүүнү талап кылышкан экен. Аларга кандай жооп болду?
Рысбек Быкын уулу: Аларга тергөө иштери бүтмөйүнчө жооп айтууга туура келбейт го.
- Дагы бир маалымат тарады, Курманбек Бакиевдин жакындарынын бири кармалды деген. Ушуга да токтоло кетсеңиз?
Рысбек Быкын уулу: Бул боюнча коопсуздук кызматкерлери тарабынан атайын жүргүзүлгөн операциясынын натыйжасында 7-августтан 8-августка оогон түнү Санжар Бакиевдин 29 жаштагы санаалашы кыргыз-казак чек арасында «Ак жол» автобекетинен кармалган. Бул кармалган киши биздин маалымат боюнча 10-апрелден 17-апрелге чейин Санжар Бакиевден Калашников үлгүсүндөгү автоматты алып, башкалар менен кошо Жалал-Абад облусунда Курманбек Бакиевди коргоп жүргөн. Бакиев өлкөдөн чыгып кеткенден кийин ал Санжар Бакиев менен чогуу жүрүп, 13-14-майда облустук администрацияны басып алуу жана элдик бийликтин колдоочулар менен кагылышууларга түздөн-түз катышкан. Мындан оң натыйжа чыкпаган соң, ал туулуп өскөн жери Өзгөн районунда жашырынып жүргөн.
- Бул айыптардын баары далилдендиби?
Рысбек Быкын уулу: Ооба, азыр да бул адам боюнча биздин кызматкерлер тергөө иштерин жүргүзүп жатышат. Кийин дагы толугураак маалымат берилет.