21-апрелде Бишкек шаарында жер басып алууну көздөгөндөргө түшүндүрүү иштери жүргүзүлүп, кырдаал жөнгө салына баштады.
Бишкектин жака-белинде жер басып алуучулардын тополоңу басаңдап, алар менен сүйлөшүүлөр жүрүп, түшүндүрүү иштери жүрүп жатканын мэрдин басма сөз катчысы Муса Коңуров “Азаттыкка” билдирип, үй куруу үчүн жерге муктаждар мыйзам чегинде документтерин даярдап жатканын, үйдүн кезегинде тургандар үчүн эмки жумада “Туңгуч” кичи аймагынан көп кабаттуу үйдүн жер пайы казылаарын айтты.
Учурда Бишкектин четиндеги Маевка айылында абал тынч. Бул тууралуу “Азаттыкка” ИИМдин басма сөз катчысынын милдетин аткаруучу Рахматулло Ахмедов кабарлап, баш-аламандыкка жол берилбей, коомдук тартип сакталып турганын билдирди.
Убактылуу өкмөт элге каршы чыккандарга катуу чара көрүлөөрүн билдирип, калкка кайрылуу менен чыкты. Анда акыркы кезде болуп жаткан окуяларга байланыштуу Убактылуу өкмөт тез арада коомдук тартипти камсыз кылууну жана зомбулук, мыйзамсыздыкты токтотуу үчүн чукул чара көрөрү айтылган.
Чукул чарага ылайык, атуулдардын өмүрүнө коркунуч келтирип, алардын үй-жайына, жеке менчигине, жарандык жана аскердик обьектилерге каракчылык менен кол салгандарга укук коргоо органдары мыйзамдын чегинде ок ата тургандыгы да белгиленген.
Убактылуу өкмөт Кыргызстандын элин сабырдуулукка, чагымчыларга алдырбоого чакырып, күч менен коомдук тартипти жана улуттар аралык мамилелерди бузууга аракет кылгандарга чогуу сокку урууну өтүнгөн.
“Кыргызстан баатырлары” кыймылынын теңтөрагасы Нарынбек Сапаловдун пикиринде, Убактылуу өкмөт чечкиндүү аракеттерди көрүп, оболу К.Бакиевдин уулдарын, бир тууганы Жаныш Бакиев баштаган адамдарды кармоолору зарыл. Анткени абалды курчутуу аракеттерин дал ошол адамдар уюштуруп аткандары көрүнүп турат. Атпесе элдин көксөөсү суубай турат.
-Убактылуу өкмөт 7-апрелдеги кандуу окуя жана мамлекеттик мүлктү талап-тоноо боюнча айыпталып аткан кулатылган президент К.Бакиев, анын уулдары Марат менен Максим, иниси Жаныш Бакиев, мурдагы өкмөт башчы Данияр Үсөнов, MGN компаниясын башкарып келген Евгений Гуревич баштаган негизги фигуранттарды кармай албады. Мындай абал 7-апрелде курман болгондордун жакындарына, мурдагы бийликке каршы болуп келген башка кыргызстандыктарга жакпай, аларды колго түшүрмөйүн, көксөөлөрү суубай турат.
Мамлекеттик улуттук коопсуздук кызматынын төрагасынын мурдагы орун басары, генерал Артур Медетбековдун пикиринде, өлкөдө саясый кырдаалды курчуткан Жаныш Бакиев баштаган топтун мүчөлөрү жакында кармалып, жазасын алышат.
Ошентсе да Убактылуу өкмөт мүчөлөрү өлкөдөгү кырдаалды көзөмөлдөп турушканын, коопсуздук маселеси биринчи орунда экенин айтышууда.
Коопсуздукту сактоого элдик кошуундар жардам беришүүдө. Октябрь райондук элдик кошундун жетекчиси Дайыр Кеникеевдин айтымында, дээрлик жаштардан турган элдик ыктыярдуу кошуундар Бишкек шаарында милиция кызматкерлерине тартипти сактоого көмөк кылышууда.