- Сиздер эл аралык полициянын келишине каршы акцияларды өткөргөндөн кийин ар кандай пикирлер пайда боло баштады, буларды кырдаалдын туркташуусун каалабаган күчтөр каржылап атат деген сыяктуу. Мунун канчалык чындыгы бар?- Мен тактап айтып кетсем, мен эч кандай партияда, эч кандай уюмда турбайм. Биздин артыбызда эч кандай күчтөр жок жана каржылоо жок. Биз өзүбүз 10, 100, 500 сомдон акча чогултуп, транспаранттарга жана башка керектүү нерселерге жумшап, кыргыз элинин арасынан чыккан жигиттер ушул акцияны уюштуруп алып чыктык. Биз жөнүндө жанагындай сөз чыгаргандар бизди жаманатты кылалы дегендер болсо керек. Мен кепилдик берем, биздин артыбызда эч кандай күч жок.
- Бийлик 52 полиция куралсыз келет, алардын мандаты чектелген, мониторинг, тренинг менен гана алектенишет деп атпайбы. Сиздер кайсы жүйөөгө таянып, каршы болуп атасыздар?- Биз кандайдыр бир жүйөөгө таянган жокпуз. Биз жөн гана тарыхка таянып, болуп өткөн окуяларды изилдеп, ошонун негизинде биз өзүбүздүн оюбузду айтып жатабыз. Биз барыбыз Югославияда эмне болгонун билебиз. Ал жака дагы НАТОнун байкоочулары келип, отчетторун жазгандан кийин куралдуу күчтөрү кирген. Косоводо дагы ушундай болгон. Мына Мали, Ооганстан 8-9 жыл болду, Иракка да башында байкоочулар эле кирген да. Бизде дагы иштетилген сценарий боюнча мындай иштер өз нугу менен кетип бара жаткандай.
- Кечээ Ош шаарында дагы ЕКУУнун полициясына каршы митинг өтүп, ага бир жарым миңден ашуун адам катышканы айтылды. Бишкекте, Ысык-Көлдө дагы ондогон адамдар катышкан митингдер өттү. Ушинтип нааразы болгондордун саны өсө берсе, эл аралык полициялар келбей калышы мүмкүнбү?- Биринчиден, кечээ биздин пландар боюнча бул акция бардык облустук борборлордо болмок. Кечээки акцияга Ош жергесинде 3 миңге чукул адам катышты, Таласта да өтө көп эмес сандагы адамдар катышты, Караколдо жана Бишкекте болду. Бул жерде бир эле маселе бар, эгер кыргыз эли жалпы каршылыгын көрсөтсө биздин өкмөтүбүз элдин сөзүн угуп, бул маселени оң жагына чечип бериш керек. Биздин Кыргызстанда бийликтин эң жогорку чеги - эл. Ошондуктан эгер жалпы эл каршы десе биздин президент өз чечимин өзгөртүп, ЕККУнун полициясын Кыргызстанга киргизүүгө тыюу салыш керек.
- Кечээки митинг учурунда сиздерди президент Роза Отунбаева өзү кабыл алган экен. Ал киши сиздерди ынандыра алдыбы?- Роза Отунбаевага беш кишиден турган делегация кирип, бир саатка жакын сүйлөшүп отурдук. Бирок биз коюлган конкреттүү суроого жооп ала алган жокпуз жана президент ынандыра алган жок. Ал жерде кыскасы биздин абал оор, эл аралык коомчулук бизди туура эмес маалыматтар аркылуу билип жатат деген сыяктуу түшүнүксүз сөздөр болду. Биз конкреттүү ЕККУнун полициясы кирбесин деген сурообузга конкреттүү жооп ала алган жокпуз жана биз аны терс жооп деп кабыл алдык.
- Мындан ары аракеттериңиздер кандай болот, акцияларды улантасыздарбы?- Мындан ары да акциялар улантылат. Кудай буюрса биз 29-августта бардык шаарларда, бардык облустун борборлорунда чоң нааразылык акцияларын өткөрүүгө даярданып жатабыз.
- Рахмат маегиңизге.
Тасмада: ЕККУ полициясына каршы Бишкектеги митинг, 26-июль.