Билимге үндөгөн тасма чыкты

“Сүйүү жөнүндөгү оюн чындыгы” деп аталган тасмада баш каармандын ролун ойногон, жергиликтүү мектептердин биринде 8-класста окуган Дастан Мадалбеков кайда жүрсө жолу болбогон баланын образын жараткан. Тасманын башында терс каармандын ролун ойноп жатканы менен, бала кездеги таттуу кыялдарды, балалыктын эң бир унутулгус учурларын мыкты аткарып, кинонун сонунда оң кейиптеги каарманга айланат.

- Бул менин биринчи тасмам. Кичинекей кезимен бери эле театрга аралашып, спектаклдерде ойноп жүргөм. Жеки Чандын кинолорун көп көрөм. Ага окшогон мыкты актер болсом деген тилегим бар. Көп актерлерду көрүп алып “мен кинолордо качан ойнойт болдум экен” деп кызыга берчүм. Кыялым орундалды окшойт. Минтип киного да тартылып калдым. Тасмада тартылып жаткан кезде мен үчүн баары жеңил эле болду. Бирок камеранын сүрү баары бир таасир этет экен. Бул ролду аткаруу үчүн жүздөгөн балдардын ичинен суурулуп чыккам.

Тасма баштан аяк Дастан жана анын сүйүп жүргөн кызы Берметтин айланасында тартылып, мектеп турмушун сүрөттөйт. Мындан сырткары негизги каармандардын бири Берметтин кыялы аркылуу дүйнөлүк жана кыргыз адабиятындагы белгилүү чыгармалардан үзүндү көрсөтүлөт. Тасмадагы башкы ролду ойногондордун бири Бермет - абдан кыялкеч жана жакшы окуган кыздын ролун жараткан.

- Өзүмдүн атым Бермет. Кинодогу атым да Бермет. Өзгөрткөн эмесмин. Келечекте ырчы, актриса болом деп жүрчүм. Буйруса мыкты актриса болгонго аракет кылам. Кино мага абдан жагат. Мен аны сүйөм.

Тасманын автору Диана Токтосунованын айтымында, тасмадагы негизги идея бул балдарды билим алууга үндөө жана билим аркылуу гана бардык нерсеге жетүүгө болот деген чакырык таштоо.

- Тасманын идеясы бир жарым жыл мурун келген. Балдарды билим алууга үндөө, китепти сүйүүгө чакыруу болуп саналат. Мисалы, азыр балдарды көп байкадым. Өспүрүмдөр китепке кызыкпай калгандай. Бүт эле интернет, компьютер оюндары менен алек болуп калышты. Анан биз ойлоно баштадык, кандай тасма тартсак, балдардын китепке болгон кызыгуусу кайра ойгонот деп. Бул тасмада “Ромео жана Жулетта”, ошондой эле Чыңгыз Айтматовдун “Кызыл алма” сыяктуу чыгармалардагы кейиптер бар.

Кинону койгон режиссер Медин Учукеевдин айтымында, тасманы тартууда кыйынчылыктар болбой койгон жок. Аны толук тартууга тогуз ай убакыт сарпталып, кино тармагында бир топ тажрыйбасы бар инсандардын тийгизген таасири чоң болгон.

- Бизде мындай сценарийлер жок болгондугуна байланыштуу Олжобай Токтосуновду, Татьяна Николаевнаны, дагы көптөгөн тасма жаратууда бир топ тажрыйбасы бар киночеберлерин чакырдык. Алар да өз ойлорун айтышып, бир топ салым кошушту. Ошондон кийин биргелешип сценарийин жазып чыктык.

“Сүйүү жөнүндөгү оюн чындыгы” аттуу тасма эми өлкөнүн бардык облустарында көрсөтүлөт. Учурда тасма кыргыз тилине которулуп жатат.