"Бала төрөп бергенден кийин талашпайм"

Кыргызстанда балалуу боло албай жүргөн үй-бүлөлөрдүн “карын эне” кызматынан пайдалануу муктаждыгы өсүүдө. Баланы курсакта чоңойтуп, тогуз ай көтөрүп, толгоо тартканы үчүн “суррогат энеге” оңой эмес акча төлөнөт. Демек ушул жол менен акча таап, турмушун оңдоону көздөгөн кыз-келиндер да жок эмес. Саламаттыкты сактоо министрлиги болсо жасалма уруктандыруу, карын эне болгон жана анын кызматын пайдалангандардын укуктарын, милдеттери менен жоопкерчилигин мыйзам аркылуу жөнгө салууну көздөп жатат. Соңку күндөрү бул маселе коомчулук, Жогорку Кеңеш депутаттары арасында талкуу жаратып, бул көрүнүш кыргыздын каада-салтына, диний ишенимине туура келбестигин белгилешүүдө.